Ekis nova intertraktado inter siria registaro kaj opoziciaj gvidantoj

Lunde en Ĝenevo, speciala sendito de la Unuiĝintaj Nacioj pri Sirio Staffan de Mistura malfermis novan nerektan intertraktadon inter reprezentantoj de la siria registaro kaj opoziciaj gvidantoj. Li diris, ke tio celas simpligi pacan intertraktadon por mildigi la preskaŭ sep-jaran internan militon.

De Mistura diris al ĵurnalistoj post sia renkontiĝo kun la siria registara delegacio estrata de siria ambsadoro al la UN Bashar Jaafari, ke ili ne atendas grandan trarompon, sed esperas laŭgradan disvolviĝon de duflanka intertraktado.

Poste en tiu tago, li ankaŭ renkontiĝis kun opoziciaj gvidantoj kaj reprezentantoj de la kvin konstantaj membroj de la Sekureca Konsilio de la UN, nome Ĉinio, Francio, Rusio, Usono kaj Britio. Li diris, ke li ricevis fortan subtenon.

La intertraktado en Ĝenevo, la sepa ĝis nun, komenciĝis en la unua plena tago de la militpaŭzo en suda Sirio, kio povas liveri pli bonan atmosferon por paca intertraktado.