Wang Yi vokis proksimigi rilatojn kun karibaj landoj

Ĉina ŝtatkonsilanto kaj ministro pri eksterlandaj aferoj Wang Yi ĵaŭde vokis proksimigi rilatojn kun karibaj landoj.

Wang faris la rimarkojn, kiam li renkontiĝis kun reprezentantoj el karibaj landoj, kiuj havas diplomatiajn rilatojn kun Ĉinio. Wang diris, ke Ĉinio kaj karibaj landoj kreis paradigmon pri rilatoj de egala traktado kaj kungajna kunlaboro inter grandaj kaj malgrandaj landoj. Li vokis ĉiujn landojn defendi la internacian ordon kun la Unuiĝintaj Nacioj ĉe la kerno kaj multflankecon bazitan sur internaciaj reguloj. Li emfazis la gravecon de daŭripova evoluigo, kaj vokis plifortigi la kunlaboron pri la iniciato Zono kaj Vojo kaj kune protekti la tutmondajn kaj regionajn pacon kaj stabilecon.

Reprezentantoj, kiuj venis al Ĉinio por ĉeesti la sepan konsiliĝon de ministroj pri eksterlandaj aferoj inter Ĉinio kaj karibaj landoj, diris, ke iliaj landoj volas konstrui la Zonon kaj Vojon kune kun Ĉinio, kaj intensigi kunordigon pri klimatŝanĝiĝo por protekti komunajn interesojn.