SOPIRO EN DECEMBRO

SOPIRO EN DECEMBRO

(laŭ la ĉinesko "sopir-al-sudo")

Luiza CAROL (Israelo)

En sudo

ĉio en ordo,

sed bird' sonĝas pri nesto,

sopiras ĉe marbordo

al fora nordo.

---------------------------------------------------------

Lulkanto por Galanto

Luiza CAROL (Israelo)

Dormu kara beb-galanto,

dormu dum la venta kanto.

Dormu sub la neĝ-kovrilo,

dormu en glaci-lulilo.

Dormu beb' de vent' vartita,

beb' kun verda ĉapo pinta,

bebo kun petal-suĉilo,

bebo kun foli-mantilo.

Nokta frost' kun aĉa dento,

Rampas kiel fi-serpento,

volus ĝi vin aĉe mordi,

volus ĝi vin aĉe tordi.

Kaŝu vin sub neĝ-kovrilo,

sidu en glaci-lulilo.

Frumatene varmo venos,

tuj la froston sun' forpelos.

Beb' kun ĉapo pinta punta,

venas la printempo bunta,

venas ĝi kun sun-radioj,

venas ĝi kun gajaj krioj.

Dormu beb' de vent' vartita,

beb' kun verda ĉapo pinta,

bebo kun petal-suĉilo,

bebo kun foli-mantilo.

-------------------------------------------

Luiza CAROL, virino 72 jaraĝa el Israelo.