Ĉinio raportis 3 143 novajn konfirmitajn kazojn de infektiĝo je nova koronaria viruso kaj 73 novajn mortojn

Ĉinaj prisanaj aŭtoritatoj vendrede diris, ke ili ricevis raportojn pri 3 143 novaj konfirmitaj kazoj de infektiĝo je nova koronaria viruso kaj 73 novaj mortoj ĵaŭde el 31 provinc-nivelaj regionoj kaj la Xinjiang-a Korpuso de Produktado kaj Konstruado.

La ĉina Nacia Komisiono pri Sano diris, ke inter la mortintoj, 69 estis en Hubei-provinco, 1 en Jilin, 1 en Henan, 1 en Guangdong kaj 1 en Hainan. La komisiono diris, ke 4 833 novaj suspektataj kazoj estis raportitaj ĵaŭde, kaj en la sama tago, 962 pacientoj serioze malsaniĝis, kaj 387 homoj estis elhospitaligitaj post resaniĝo.

La komisiono diris, ke la totala nombro de konfirmitaj kazoj en la ĉina ĉeftero kalkuliĝis al 31 161 ĝis la fino de ĵaŭdo, kaj entute 636 homoj mortis pro la malsano. Ĝi aldonis, ke 4 821 pacientoj restis en severaj kondiĉoj, kaj 26 359 homoj estis suspektataj pri infektiĝo je la viruso. Entute 1 540 homoj estis elhospitaligitaj post resaniĝo.

La komisiono diris ankaŭ, ke 314 028 proksimaj kontaktantoj estis spuritaj, kaj inter ili 26 762 estis liberigitaj de medicina observado ĵaŭde, kun 186 045 aliaj restantaj sub medicina observado.