En Shangri-la ekzistas fama ŝtata parko Pudacuo konsistanta el montvaloj, riveretoj, lagoj, stepoj, marĉoj, raraj animaloj kaj vegetaloj. Ĉiutage, tibeta ĉiĉerono fraŭlino Drolma kondukas diverslandajn turistojn al tiuj vidindaĵoj, por ke ili spertu la pentrindan naturan medion. Jen ŝia voĉo:

"Bonan matenon, respektindaj geamikoj! Bonvenon al la mirinda kaj ĉarma ŝtata parko Pudacuo de Shangri-la. Mi estas ĉiĉerono de la parko, kaj vi povas simple nomi min Drolma. Mi deziras al vi agrablan vojaĝon kaj bonan farton ĉi tie. Mi esperas, ke la belaj naturaj pejzaĝoj de la parko donu al vi neforgeseblan impreson."

En la tibeta lingvo, la vorto "drolma" signifas "feinon". La 21-jara knabino Drolma estas indiĝeno de Shangri-la, ŝi lertas en kantado kaj dancado, kaj povas flue paroli en la ĉina komuna idiomo. Ŝi vere meritas sian nomon, ĉar ŝi estas bela kiel alpa rozo kreskanta sur verda monto kaj ĉe smeralda rivero.

En la parko Pudacuo estas la vasta primitiva arbaro kaj ĉie videblas rododendraj floroj. La tint-sonoranta font-akvo fluas de altaj montoj, disŝutante sur ambaŭflankajn arbedojn la ŝaŭmojn, radiantajn je bunt-koloraj briloj, kaj post enfluado en la montvalon, ĝi fariĝis du alpaj lagoj safirecaj. La primitiva arbaro de la parko similas al la natura oksigena tenejo, birdoj gaje pepadas kaj fiŝoj libere petoladas. En la malproksima fono konturiĝas imponaj neĝmontoj, kaj la kotoneskaj nuboj flosantaj en la blua ĉielo preskaŭ tuŝeblas per-mane. La turistoj sentas sin kvazaŭ esti en la plej viveca tuĉ-pentraĵo.

Jen kantas bela tibeta ĉiĉerono Drolma por turistoj, kiuj sin trovas en la pentrindaj naturaj pejzaĝoj de Shangri-la. Antaŭ du jaroj, Drolma diplomiĝis el la turisma kolegio de Shangri-la, kaj fariĝis profesia ĉiĉerono de la ŝtata parko Pudacuo, pro tio ŝi estis ege emociata.