Ĉinio firme oponas enmiksiĝon de Germanio kaj Francio en internajn aferojn

Zhao Lijian, proparolanto de la Ministerio de Eksterlandaj Aferoj, diris ĵaŭde en gazetara konferenco, ke Ĉinio firme oponas la movojn de Germanio kaj Francio, kiuj politikigas la juĝan kunlaboron de Honkongo, intervenas en la internajn aferojn de Ĉinio kaj malobservas internacian leĝon kaj bazajn normojn regantajn internaciajn rilatojn.

La proparolanto faris la rimarkojn, post kiam la ĉina Honkonga Speciala Administracia Regiono (HSAR) decidis suspendi siajn ekstradiciajn interkonsentojn kun Germanio kaj Francio.

Antaŭ la decido, Germanio kaj Francio unuflanke anoncis la suspendon de efektivigo de la interkonsento pri Transdono de Fuĝintaj Krimuloj kaj haltigis ratifikon de la rilata interkonsento kun la HSAR, respektive.

Zhao diris, ke la maljustaj agoj de Germanio kaj Francio subfosas la bazon de la juĝa kunlaboro de la HSAR kun fremdaj landoj kaj devias de la celo de juĝa kunlaboro subteni justecon kaj laŭleĝan regadon.

Zhao aldonis, "Pro tio, Ĉinio decidis, ke la HSAR suspendu efektivigon de la interkonsento pri Transdono de Fuĝintaj Krimuloj kun Germanio kaj flankenmetu la interkonsenton pri Transdono de Fuĝintaj Krimuloj kun Francio.”

La interkonsento inter Honkongo kaj Germanio estis subskribita en majo de 2006 kaj validiĝis en aprilo de 2009, kaj tiu inter Honkongo kaj Francio estis subskribita en majo de 2017, sed ankoraŭ ne ekvalidiĝis.