Usui konsultas te-teknikistinon

Hodiaŭ matene ni iris al alia kampo de te-arbetoj. Regas tie, same kiel hieraŭ, idilia atmosfero de la ĉina kamparo. Ni lernis, ke en la te-fabriko de nia gastiganto konstante laboras ĉirkaŭ 50 personoj. Sed nuntempe aldone al ili multaj maljunaj kamparaninoj estas kun pago mobilizitaj por la plukado de junaj te-folioj. Oni informis nin, ke tiu mobilizado komenciĝis per la Qingming-festo komence de aprilo kaj kun diversaj intervaloj daŭras sume ĉirkaŭ dudek tagojn.