Ĉina prezidanto Xi Jinping ĵaŭde alparolis per videoligo la malferman ceremonion de la altnivela segmento de la dua parto de la 15a kunveno de la Konferenco de la Partioj al la Konvencio pri Biologia Diverseco (KPKBD), okazigita en la Montrealo, Kanado.

Xi diris, ke la homaro loĝas en komunumo kun komuna estonteco, kaj solidareco kaj kunlaboro estas la sola efika maniero trakti tutmondajn defiojn.

"Bona ekosistemo estas esenca por la prospero de civilizacio. Ni devas labori kune por antaŭenigi harmonian kunekzistadon inter homo kaj naturo, konstrui komunumon de ĉiuj vivoj sur la Tero kaj krei puran kaj belan mondon por ni ĉiuj," Xi diris.

"Ni bezonas starigi tutmondan konsenton pri protekto de biodiverseco, kune labori por la konkludo de la post-2020-a Tutmonda Biodiverseca Kadro, kaj identigi celojn kaj vojojn por tutmonda protekto de biodiverseco,” diris la prezidanto.

"Ni devas antaŭenpuŝi la tutmondan procezon de protekto de biodiverseco, turni ambiciojn en agadojn, subteni evoluantajn landojn en kapablokonstruado kaj kunordigi klopodojn por trakti klimatŝanĝiĝojn, perdon de biodiverseco kaj aliajn tutmondajn defiojn," li aldonis.

"Ni devas antaŭenigi verdan disvolviĝon per protekto de biodiverseco, rapidigi la verdan transiron de disvolvaj reĝimoj kaj vivstilo kaj utiligi la Tutmondan Disvolvan Iniciaton por liveri pli grandajn avantaĝojn al popoloj de ĉiuj landoj," li diris.

"Ni devas konservi justan kaj egalan tutmondan ordon pri protekto de biodiverseco, firme defendi veran multflankismon, firme subteni la internacian sistemon kun la UN kiel la centro kaj la internacian ordon bazitan sur internacia leĝo kaj formi fortan sinergion por protekti la Teron, nian komunan hejmon," li aldonis.

“Ĉinio faris aktivajn klopodojn por antaŭenigi ekologian progreson kaj protekton de biodiverseco,” Xi diris, aldonante, ke la diverseco, stabileco kaj daŭripovo de la ekosistemo daŭre pliboniĝis.

"Ni trovis vojon de protekto de biodiverseco kun ĉinaj trajtoj," Xi diris.

“Rigardante antaŭen al la estonteco, Ĉinio plu antaŭenigos ekologian progreson kaj planos sian disvolviĝon en la kunteksto de antaŭenigo de harmonia kunekzistado inter homo kaj naturo. Ni respondos al la Agadplano por la Jardeko de la UN pri Ekosistema Restarigo, kaj komencos grandan nombron da ŝlosilaj projektoj pri protekto kaj restarigo de biodiverseco. Ni profundigos internaciajn interŝanĝojn kaj kunlaboron," Xi diris.

"Ni faros nian plejeblon por liveri subtenon kaj helpon al aliaj evoluantaj landoj per la Internacia Verda Disvolva Koalicio de la Iniciato de la Zono kaj Vojo kaj la Kunming-a Biodiverseca Fonduso, por levi la tutmondan biodiversecan regadon al nova alto," li aldonis.