Ĉina sendito al la Unuiĝintaj Nacioj (UN) urĝis Israelon plene efektivigi la rezolucion de la UN pri batalhalto en Gazao vendrede, dirante, ke la gazaa tragedio provas la konsciencon de la homaro kaj la kredindecon de la Sekureca Konsilio de UN.

"Ni urĝas Israelon tuj efektivigi la postulojn de la rezolucio kaj ĉesigi sian militan ofensivon kontraŭ Gazao kaj kolektivan punon kontraŭ gazaaj civiluloj,” diris Dai Bing, aferŝarĝito de la ĉina konstanta misio al la UN, vendrede en la Sekureca Konsilio de la UN.

Li alvokis ĉefajn landojn ludi aktivan rolon por antaŭenigi la efektivigon de la rezolucio kaj diris, ke Ĉinio subtenas la Sekurecan Konsilion de la UN fari "iun ajn necesan agon".

Dai deklaris, ke humanecaj katastrofoj en Gazao atingis kritan punkton, kaj Israelo devas plene efektivigi la provizorajn rimedojn publikigitajn de la Internacia Kortumo, inkluzive de nuligo de blokado kaj obstakloj al humanitara aliro al Gazao, kaj plena malfermo de Rafah kaj ĉiuj teraj trairejoj por garantii rapidajn, sufiĉajn kaj sekurajn humanitarajn provizojn al la regiono.

Li kondamnis atakon de Israelo kontraŭ humanitaraj transportaj veturiloj kaj urĝis Israelon observi internacian leĝon kaj internacian humanitaran leĝon, ĉesigi atakojn kontraŭ humanitaraj agentejoj kaj personaro, kaj kunlabori kun humanitaraj agentejoj por fari helpon.