Ĉinio kaj Vjetnamio, du socialismaj landoj kaj proksimaj najbaroj, subtenis unu la alian kaj lernis unu de la alia en la pasinteco, skribante bonegan historion de tradicia amikeco. Fine de la pasinta jaro, la du flankoj kune anoncis la konstruadon de la ĉina-vjetnama komunumo kun komuna estonteco de strategia graveco, malfermante novan epokon en la rilatoj inter la du partioj kaj inter la du landoj. Kiel la du flankoj povas revigligi la tradician amikecon en grava periodo de disvolvado kaj renormaligo? Dum la ŝtata vizito de ĝenerala sekretario de la Centra Komitato de la Komunista Partio de Vjetnamio kaj prezidanto de la Vjetnama Socialisma Respubliko To Lam al Ĉinio de la 18a ĝis la 20a de aŭgusto, la du flankoj donis klaran respondon.

Tio estas la unua eksterlanda vizito de To Lam de post lia enoficiĝo kiel ĝenerala sekretario de la Centra Komitato de la Komunista Partio de Vjetnamio en la komenco de ĉi tiu monato, substrekante la altnivelan kaj strategian gravecon de ĉina-vjetnamaj rilatoj. Dum renkontiĝo kun ĉina prezidanto Xi Jinping, la vortoj "prioritato" kaj "profundigo" estis plurfoje emfazitaj. La ĉina flanko diris, ke ĝi rigardas Vjetnamion kiel prioritatan direkton en sia najbara diplomatio, kaj la vjetnama flanko priskribis Ĉinion kiel strategian elekton kaj ĉefan prioritaton en sia ekstera politiko.

Ĉinio kaj Vjetnamio konservas striktajn ekonomiajn kaj komercajn rilatojn kaj havas fortan industrian komplementecon. Estas granda potencialo por profundigi praktikan kunlaboron. Ĉinio estas la plej granda komerca partnero de Vjetnamio de multaj jaroj, kaj Vjetnamio estas la plej granda komerca partnero de Ĉinio en la Asocio de Sudorient-Aziaj Landoj kaj la kvara plej granda komerca partnero tutmonde. En la unua duono de ĉi tiu jaro, la duflanka komerco inter la du landoj kreskis je ĉirkaŭ 20,6% kompare kun la sama periodo de la lasta jaro. Dum la vizito de To Lam al Ĉinio, la du landoj konsentis plivastigi kunlaboron en agrikulturo, infrastrukturo, energio, cifereca ekonomio, verda disvolviĝo kaj mina industrio.

Interregistaraj rilatoj multe dependas de amikeco inter popoloj. En majo de tiu ĉi jaro, 357 000 ĉinaj turistoj vizitis Vjetnamion, farante Ĉinion denove la plej granda fonto de turistoj por Vjetnamio. Venontjare Ĉinio kaj Vjetnamio festos la 75an datrevenon de la starigo de diplomatiaj rilatoj kaj kune organizos serion da aktivadoj kiel la Ĉina-Vjetnama Jaro de Interpopolaj Interŝanĝoj. Estas atendeble, ke la koroj de la du popoloj daŭre proksimiĝos.