Je la 7-a horo de la 10-a de novembro 2012 s-ro Li Shijun, eminenta ĉina E-tradukisto, por ĉiam forlasis nin. Lia forpaso estas granda perdo ne nur por la ĉina, sed ankaŭ por la monda E-movado.

La aŭtoro interparolas kun Li Shijun en la kunsido por memori la 125-jariĝon de Esperanto en la 12-a de oktobro 2012.

Kiam mi aŭdis pri la malĝoja informo, mi ne povis akcepti ĝin. En la 12-a de oktobro, 4 semajnojn antaŭ lia forpaso, mi interparolis kun li en la memorkunveno pri la 125-jariĝo de Esperanto kaj kunsido pri eldonado de la albumo Antaŭen kun Espero. Tiu-tage li estis viglecplena kun sonora voĉo, kaj tute ne aspektis kiel homo preskaŭ 90-jara.

Ni ĉiuj tute ne atendis, ke li tiom subite forpasos.

La aŭtoro (maldekstre) en la hejmo de Li Shijun en la 21-a de marto 2008

La aŭtoro (la 2-a de maldekstre) donas al Li Shijun librojn de li esperantigitajn en la 20-a de julio 2009.

Ricevinte la informon pri lia forpaso mi tuj iris al lia loĝejo en Pekino. En la lastaj jaroj, nome de la Ĉina Esperanto-Ligo kaj de la Ĉina Asocio de Tradukistoj, mi multfoje vizitis lin, faman tradukiston, eksan vicĉefredaktoron de El Popola Ĉinio, Esperantan edukiston kaj verkiston, por festi lian naskiĝtagon, sendi al li liajn nove eldonitajn tradukaĵojn aŭ por peti liajn opiniojn pri la laboro de la Ĉina Esperanto-Ligo… Niaj intervidiĝoj estis agrablaj kaj mi ĉiam estis impresita de liaj entuziasmo kaj erudicio.

Sed ĉi-foje, kiam mi refoje eniris en lian loĝejon, granda malĝojo plenigis mian koron.

 <<  1 2 3 4 5  >>