Tibor Sekelj

Tibor Sekelj

(Marjorie Boulton)

Jen Tibor Sekelj, kun safiraj

okuloj, kaj kun pioniraj

instinktoj; kun mentono kakta

kaj forta eta korp' kompakta.

Li senspirige anekdotas,

preterkalkule poliglotas,

sed tre nescias li pri… timo

dum sia stranga vivpilgrimo!

Kiel knabet', li fosis truon,

volante kapti kanguruon,

kaj trovi Aŭstralion mine.

Ĉu poste li rezignis. Li? Ne!

Ne revis li; li draste agis;

tra la varia mond' li vagis;

por li, kuiris varmaj fontoj,

kaj lin invitis altaj montoj.

Li manĝis vermojn kaj serpentojn,

trairis ĉiujn kontinentojn;

kun kanibaloj en arbaro

vivis, amiko kaj najbaro.

Kun tiu scivolemo gaja,

esploris pri kulturo Maja.

Sukplenas viv' por li ĉerize,

kvankam li loĝas nur valize.

Vojaĝis li, por nia Cel',

al grekoj, turkoj, Izrael',

persoj kaj hindoj… poste, gongo

ŝajne lin vokis al Hongkongo.

Li en Ĉinujo multan rizon

manĝis, forportis li valizon

poste al Kathmandu, kaj poste…

Li estas vagemul' ĝisoste!

Revenas li. Li eminentu

ĉe ni; do, jen! mi lin prezentu –

Li ne el lernolibro legos,

sed plej spertinte li prelegos

pri glora monda panoram'…

Sed hop! li malaperis jam!