Stary Browar

Publikigita: 2020-07-13 17:36:31
Dividu
Dividu Close
Messenger Messenger Pinterest LinkedIn

STARY BROWAR (Suso Moinhos)

La estontaj homoj estos larĝ-kapuloj

Carl Støp-Bowitz

Ni ĉiuj estas inicitoj

en la misteroj de Gucci.

En la nova katedralo de la homo

rulŝtuparoj palankenas,

nin retrenas tra la haloj de l' indiferento ―

la futur' alvenis.

La lumo tra l' vitraloj de la butikcentro,

konspire peko-tira,

afektas elaĉeti niajn korpojn per banpuro ―

la paseon plene ĝi forviŝas. Sendube la prahomo java

estis kanibalo, sed ĉi balo

sole civitanojn celas.

El ambonoj sacerdotoj jam elektis

la novicojn indajn je la savo

en reflekto konveksa de l' miraĝo:

ni ĉiuj al ĝi rajtas, sufokinte

fidele, feramane, l'intimon triamondan.

Se ne estas tritikkampo, ili ĝin proponas,

se aŭroro mankas, ili ĝin aŭguras,

ĝis malsato kuŝos en sakstrato fora.

Ne la komerc' uzura

la templon invadis ― ĝi la templo estas.

Ĉe angulo neceseja

sub muziko de Rihanna olda dio ploras.

(Noto: Stary Browar estas granda butikcentro en Poznano, Pollando).

Dividu