Ĉina ĉefministro urĝas klopodojn por stabiligi dungadon kaj protekti vivrimedojn

Ĉina ĉefministro Li Keqiang alvokis pli fortajn klopodojn por akceli ekonomian renormaliĝon por fortigi merkatajn entojn, certigi stabilecon de dungado kaj protekti vivrimedojn de la popolo.

Li, ankaŭ membro de la Konstanta Komitato de la Politika Buroo de la Centra Komitato de la Komunista Partio de Ĉinio, lunde faris la rimarkojn dum inspektado al du ŝtataj organoj.

Vizitante teknikan gvidan centron por trejnado pri dungado de la Ministerio pri Homaj Resursoj kaj Socia Sekureco, Li instigis klopodojn por plu katalizi entreprenadon kaj novigon kaj doni egalan subtenon al merkataj entoj de ĉiuj specoj, inkluzive de tiuj en la privata sektoro kaj mem-dungitaj individuoj.

Li diris,ke metia trejnado devas adaptiĝi al merkata postulo, substrekante la gravecon de maksimumigo de la avantaĝoj de la lando en homaj resursoj.

Aŭdinte raporton pri la nuna situacio pri dungado de la lando, Li diris, ke stabila dungado estas esenca signo, ke la ekonomio funkcias en taŭga intervalo. La ĉina ekonomio progresis en renormaliĝo, sed la fundamentoj por renormaliĝo ankoraŭ ne estas sufiĉe solidaj, kaj la tasko por stabiligi dungadon restas peniga.

Rimarkinte, ke disvolvo estas ŝlosilo por solvi ĉiujn problemojn alfrontatajn de la lando, Li diris, ke plifortigo de dungado per apogado de merkataj estaĵoj estas tre grava inter klopodoj por stabiligi la ekonomion.

Li diris, ke oni devas klopodi por pliigi merkatajn laborŝancojn, plibonigi karierservojn por universitataj diplomiĝintoj kaj pligrandigi dungadon por migrantaj laboristoj kiel formo de socia helpo.

Dum sia vizito al la Ministerio de Sociaj Aferoj, la ĉefministro ricevis informojn pri la malriĉa loĝantaro kaj la efektivigo de politikoj pri socia helpo. Li postulis klopodojn por kunordigi politikojn de socia helpo kun politikoj pri dungado kaj kuraĝigi homojn labori forte por pli bonaj vivoj.

Li diris, ke la nuna revigliĝo de KOVIM-19 kaj naturaj katastrofoj kaŭzis pliiĝon de la nombro de homoj alfrontantaj malfacilaĵojn. Li emfazis urĝecon enigi homojn bezonatajn en sistemojn de socia helpo, plivastigi la skalon de socia helpo, kaj malhelpi al la iam malriĉa loĝantaro de Ĉinio grandnombre reveni en malriĉecon.

Li diris, ke oni devas klopodi por certigi ankaŭ, ke pensioj estu pagitaj plene kaj ĝustatempe, kaj registara laboro pri deviga edukado kaj baza sanservo kaj loĝado devas esti bone plenumita.