Ĉinio publikigas agoplanon akceli industrian energian efikecon

Ĉinaj aŭtoritatoj publikigis agoplanon pri akcelo de industria energia efikeco, detaligante ĉefajn celojn kaj taskojn por optimumigi la energian strukturon dum la lando faras konstantajn paŝojn por stimuli verdan transformon.

Ĝis 2025, Ĉinio celas atingi ampleksan plibonigon de la energia efikeco de ĉefaj industriaj sektoroj, grandan kreskon de energia efikeco en ŝlosilaj kampoj kiel datumcentroj, kaj plialtiĝon de la proporcio de uzado de verda malaltkarbona energio, laŭ la plano komune publikigita de ses registaraj departementoj inkluzive de la Ministerio pri Industrio kaj Informadika Teknologio.

Energia efikeco en sektoroj inkluzive de fero kaj ŝtalo, petrolkemiaĵo, neferaj metaloj kaj konstrumaterialoj atingos internacie progresintan nivelon ĝis tiam, laŭ la plano.

Ĝis 2025 Ĉinio celas redukti la energian konsumon po unuo de la aldona valoro de la grandaj industriaj entreprenoj de la lando kun jaraj enspezoj de pli ol 20 milionoj da juanoj (ĉirkaŭ 2,99 milionoj da usonaj dolaroj) je 13,5% ol la nivelo de 2020.

Antaŭaj datumoj montris, ke la energia konsumo po unuo de aldonita valoro de la grandaj industriaj entreprenoj de Ĉinio en 2021 malpliiĝis je 5,6% ol la antaŭa jaro, kaj je 16% dum la periodo de 2016 ĝis 2020.