Pento

Pento

(Mao Zifu)

mi pensis, mi povas konkeri

konatojn, starante sur nekonatan kampon.

pere de vento superŝuti

la lokon per semoj strangaj

ebligas al mi tuj rikolti glorojn nevelkemajn.

ricevinte florojn paperajn,

ilin mi metis sur la kapon

por tenti papiliojn sed venis tineoj.

mi puŝis mian ombron en la sunon,

volonte eklipsi terglobon la etan.

en grandan nigron mi mem falis pretervole.

riĉaj almozuloj serĉas stelojn dum la tago.

mi bruligas miajn vortojn

por doni al ili fumon kulopelan,

ili tamen preferas fetoron

de solida mono aŭ fluida nomo.

per la cindro glacia mi spicas

mian pison. trinki tiun mison, oni diras,

povas kuraci masklan sterilecon.

vere, nun miaj versoj perverse

perversias sur libroj seninkaj.