"La templo konstruiĝis en la jaro 586 p. K. en la tempo de Sui-dinastio, kaj jam aĝas je proksimume 1 500 jaroj. En la dinastio Song ( 960 – 1279 ), laŭ ordono de imperiestro Taizu, oni muldis en la templo bronzan bodisatvan statuon, kaj sekve konstruis ankaŭ Dabei-halon por ĝi. Nun videblas la sufiĉe bone konservata ensemblo de la dinastio Song."

En la tempo de imperiestro Shengzu kaj tiu de imperiestro Gaozong de la dinastio Qing ( 1644 – 1911 ), laŭ imperiestra dekreto, oni dufoje faris grandskalan riparadon kaj aldonan konstruadon. Historie, la templo Longxing akceptis imperiestrojn el pluraj dinastioj. Nun ankoraŭ videblas nemalmultaj epigrafoj skribitaj de tiuj imperiestroj.

La ĉefa konstruo de la templo Longxing estas Dabei-halo, kun tri etaĝoj kaj kvin-tavolaj tegmentrandoj. La halo altas je 33 metroj. En la centro de la halo sidas la bronza bodisatva statuo alta je 21,3 metroj. Jen estas mil-mana kaj mil-okula Avalokitesvaro. Tiu bronza statuo estis muldita en la jaro 971 en la dinastio Song laŭ imperiestra ordono. Laŭdire, la muldadon plenumis ĉirkaŭ tri mil metiartistoj dum 4 jaroj. Laŭ konigo fare de la ĉiĉeronino, la statuo estas la plej alta bronza statuo de Avalokitesvaro en Ĉinio kaj ankaŭ rara en la mondo. Ŝi diris:

"Kial ĝi estas nomata mil-mana kaj mil-okula Avalokitesvaro? Vidu, ĝi havas du manojn kunmetitajn antaŭ sia brusto, kaj ankaŭ 40 manojn ambaŭ flanke de la korpo. Laŭdire, en ĉiu manplato estas okulo, kaj ĉiu mano tenas 25 talismanojn, tio signifas, ke Avalokitesvaro kun mil manoj kaj mil okuloj posedas senlime potencan kapablon."

Menciinde estas, ke pro granda alteco de tiu bodisatva statuo, en la antikva tempo metiartistoj plenumis la muldadon de la statuo en sep fojoj, farante unue ĝian lotusfloran podion, kaj poste ĝian korpon parto post parto. Post kiam la bronza statuo estis finmuldita, oni konstruis halon por ĝi, nome la Dabei-halo.

En la Mahavira Halo de la templo Longxing vidiĝas pli ol 420 kvadrataj metroj da brilaj freskoj el la dinastio Ming ( 1368 – 1644 ). La freskoj temas pri rakontoj el la budaisma sutro, ekzemple la biografio de Ŝakjamunio.

En la Vajrokana Halo konstruita en la dinastio Ming troviĝas statuo de la budho Vajrokano. La statuo kun rafinita projekto kaj groteska figuro estas raraĵo en la skulptura historio. En la jaro 1933, fama ĉina arkitekto s-ro Liang Sicheng vizitis la templon kaj notis la statuon kiel unikan ekzemplon en la monda arkitekturo.

En la Moni-halo de la templo ekzistas la kolora statuo de Avalokitesvaro. Kun la milda rideto kaj plezura pozo, la bodisatvo manifestas eksterordinaran ĉarmon kaj donas neforgeseblan impreson al spektantoj. Siatempe, fama arkitekto s-ro Liang Sicheng fotis ĝin kaj donacis la foton al s-ro Lusin, fama literaturisto de Ĉinio. S-ro Lusin nomis la statuon "Orienta Afrodita". Ĝis nun tiu foto ankoraŭ restas sur la skribtablo de s-ro Lusin en lia malnova loĝejo en Pekino.

Vidiĝas multaj vizitantoj en la templo Longxing. Ni intervjuis iun sinjorinon akompanatan de ŝiaj edzo kaj filo. Ŝi diris:

"La mil-mana kaj mil-okula bodisatva statuo estas valorega kultura relikvo, mi volas montri ĝin al mia filo, kiu vizitas elementan lernejon. Ĉi tie la medio estas tre agrabla, kaj ni sentas nin plezuraj."

Inter la vizitantoj de la templo Longxing vidiĝis ankaŭ alilandanoj. Ni faris intervjuon al s-ro Paulo Vicendini el Brazilo. Li diris:

"Estante historiisto, mi esploras pri la ĉina kulturo de longa tempo. Antaŭe mi jam legis multajn materialojn kaj opiniis, ke mi jam estas sufiĉe erudicia pri Ĉinio. Tamen, kiam mi venis al Ĉinio, ĝia brila kulturo fascinas min, kaj mi apenaŭ kredas, ke mi vere staras ĉi tie."

Ni intervjuis ankaŭ s-ron Zhang Guoqing, estron de la loka turisma buroo. Li diris:

"Ĉi tie estas multaj valoraj relikvoj postlasitaj de la longa historio. La loka instanco nun faras preparadon por prezenti al Unesko kelkajn ŝtatnivelajn antikvaĵojn, kia la templo Longxing, por ke Unesko enlistigu ilin en la Katalogon de Mondaj Naturaj kaj Kulturaj Heredaĵoj."

Sed nun la plej urĝa problemo estas, kiamaniere protekti tiujn antikvaĵojn, ĉu ne? Pri nia demando, s-ro Zhang Guoqing respondis:

"Ni jam invitis specialistojn kaj fakulojn ĉi tien, kaj ili faras enketadon kaj esploradon pri diversaj rimedoj de protektado kaj flegado. Ni agos laŭ iliaj proponoj. Ni ankaŭ ekspedis delegaciojn al aliaj landoj por asimili utilajn spertojn ĉirilate."

Same kiel aliaj budaismaj temploj, ankaŭ en la templo Longxing ekzistas pagodoj. Ni trovis, ke ĉi tie ankaŭ videblas Sovaĝansera Pagodo simila al tiu en la urbo Xi'an. Ĉiĉeronino diris al ni, ke tiu ĉi pagodo aperis pli frue ol tiu de X'an. La Sovaĝansera Pagodo de la templo Longxing havas la subteran palacon, kie antaŭe rezerviĝis valoraj religiaj relikvoj.