Ĉina prezidanto Xi Jinping kaj la plej alta gvidanto de la Korea Popola Demokratia Respubliko (KDPR) Kim Jong Un lunde kune difinis 2024 kiel la Jaron de Amikeco de Ĉinio kaj KDPR kaj komencis serion da aktivadoj.

Xi, ankaŭ ĝenerala sekretario de la Centra Komitato de la Komunista Partio de Ĉinio (KPĈ), kaj Kim, ĝenerala sekretario de la Laborista Partio de Koreio (LPK) kaj prezidanto de la Komisiono pri Ŝtataj Aferoj de la KDPR, faris la anoncon en sia interŝanĝo de novjaraj gratulaj mesaĝoj.

En sia mesaĝo, Xi montris, ke Ĉinio kaj KDPR estas amikaj najbaroj ligitaj per montoj kaj riveroj, dirante, ke la tradicia amikeco inter Ĉinio kaj KDPR estas forĝita de la pli maljuna generacio de gvidantoj de la du partioj kaj du landoj, cementita en la revolucia lukto, kaj senĉese profundigita en la kurso de socialisma konstruado.

Xi diris, ke en la lastaj jaroj, la tradicia amikeca kunlaboro inter Ĉinio kaj KDPR eniris novan historian periodon kun komuna klopodo.

Xi diris, ke Ĉinio pretas labori kun KDPR por preni la 75an datrevenon de dulandaj diplomatiaj rilatoj kaj la Jaron de Amikeco de Ĉinio kaj KDPR kiel oportunon por antaŭenigi la longdaŭran amikecon, profundigi strategian reciprokan konfidon, plifortigi interŝanĝojn kaj kunlaboron, kaj certigi, ke duflankaj rilatoj antaŭeniru kun la tempo por pli granda disvolviĝo por pli bone profitigi la du popolojn, kaj senĉese fari novajn kontribuojn al protekto de paco kaj stabileco de la regiono.

En sia mesaĝo, Kim rimarkigis, ke 2024 estas signifa jaro, kiu markas la 75an datrevenon de diplomatiaj rilatoj inter KDPR kaj Ĉinio, dirante, ke socialisma konstruado en la du landoj nun eniris novan etapon de progreso kaj la internacia situacio suferas kompleksajn ŝanĝiĝojn.

Kim aldonis, ke la du partioj kaj registaroj decidis difini 2024 kiel la Jaron de Amikeco de Ĉinio kaj KDPR, kaj plu antaŭenigi la tradiciajn rilatojn de amikeco kaj kunlaboro inter la du flankoj konforme al la bezonoj de la epoko, kiu konformas al la komuna atendo kaj deziro de la homoj de la du landoj.

Li diris, ke la nerompebla amikeco de KDPR kaj Ĉinio, forĝita kaj firmigita en la lukto por socialismo, plene montriĝos ĉi-jare.