Proparolanto de la Ministerio pri Eksteraj Aferoj lunde refutis komunan deklaron publikigitan de la Triflanka Hind-Pacifika Dialogo inter Usono, Japanio kaj Sud-Koreio.

Proparolanto Mao Ning faris la rimarkojn en ĉiutaga gazetara konferenco responde al demando pri la komuna deklaro, kiu estis publikigita de la Ŝtata Departemento de Usono la 6an de januaro. Ĝi esprimis la zorgojn de la tri landoj pri la maraj postuloj de Ĉinio en la Suda Ĉina Maro kaj "eskalada konduto", kaj diris, ke Usono, Japanio kaj Sud-Koreio "daŭrigos sian triflankan kunlaboron pri mara sekureco kaj leĝplenumo konforme al internacia leĝo".

La tri landoj ankaŭ reasertis, ke paco kaj stabileco de la Tajvana Markolo estas nemankigeblaj por sekureco kaj prospero en la internacia komunumo.

"Ĉinio rimarkis la triflankan dialogon kaj ĝian komunan deklaron," Mao diris, esprimante gravajn zorgojn pri la retoriko de la deklaro pri Ĉinio.

"Ni firme oponas la intencon de ĉi tiuj landoj kunmeti ekskluzivajn grupojn en la nomo de kunlaboro, intense interveni en la internajn aferojn de Ĉinio, ataki kaj kalumnii Ĉinion kaj provoki konfrontiĝon kaj antagonismon," la proparolanto diris.