Laŭ historiaj notoj, en la dinastio Tang, granda nombro da persaj komercistoj venis al Xi'an por komercado. Parto el ili, inkline al la prospero de tiu ĉi metropolo, fiksloĝis en la menciita urbparto kaj iom post iom formis la naciecon Hui. Heredante la trajtojn de siaj prauloj, la viraj loĝantoj de la Hui-a Kvartalo aspektas fortikaj kaj bravaj, ĝenerale kun vanga barbo kaj bukla hararo, kaj la inaj, denaske belaj, ĉarmaj kaj altstaturaj.

Ĉiutage, kiam eklumas lampoj en la Hui-a Kvartalo, en ĉiu strato de la kvartalo ŝvebas apetitoveka odoro. Frandemuloj svarmas tien por ĝui centojn da tradiciaj bongustaĵoj propraj de la Hui-nacieco. Iliaj tradiciaj manĝaĵoj el ŝafaĵo, pasto, bovaĵo, persimono ktp. ravas turistojn ĉinajn kaj alilandajn.