|
|
 |
| (GMT+08:00)
2004-02-06 16:36:29
|
 |
|
La pitoreskaj lago Sayram kaj valo Guozigou
cri
Laŭ la norda branĉo de la antikva Silka Vojo norde de la montaro Tianshan, ŝoseo etendiĝas de Urumĉi, ĉefurbo de la Xinjiang-a Ujgura Aŭtonoma Regiono, al la doganejo Korgas najbare al Kazaĥstano. Ĉe la fino de la ŝoseo kuŝas la lago Sayram, kies bordo estas de antikve paŝtejo, kaj trapasejo por surkamelaj karavanoj vojaĝontaj al la valo de la rivero Yili.
La lago Sayram, kun alteco de 2 073 metroj super la marnivelo, longeco de 30 kilometroj, larĝeco de 20 kilometroj kaj profundeco de 90 metroj estas alpa lago, plej granda kaj alta en Xinjiang. Ĝi naskiĝis pro sinkado de terkrusto dum formiĝo de Himalajo antaŭ 70 milionoj da jaroj. Pri ĝia naskiĝo cirkulas bela legendo inter la lokanoj.
Antaŭ tre tre longe, tie sterniĝis fekunda stepo. Sur ĝi paŝtis bonkora kaj laborema knabino Qiean kun honesta kaj forta junulo Sidek. Ili enamiĝis unu al la alia. Sed la tirano sur la stepo intencis fari Qietan sia kromedzino. Rifuzinte tion, ŝi forkuris, persekutate de gardistoj de la tirano. Ŝi trovis profundan lagon kaj ensaltis en ĝin. Informiĝinte pri tio, Sidek hastis al la lago, mortigis la gardistojn kaj sin ĵetis en la lagon, vokante la nomon de sia amatino. Tuj la lago ekondegis kaj dronigis la tiranon kaj lian palacon. Kaj la vasta stepo fariĝis akvovastaĵo. Jen estas la lago Sayram.
* * * * *
"Oni ne povas apreci la ĉarmon de la montaro Tianshan, se ne en la valo Guozigou." ofte diras Xinjiang-anoj.
La valo Guozigou sin kaŝas en la monto Taleqi sude de la lago Sayram. Ĝi, kun longeco de pli ol 70 kilometroj direktas sin de norde suden. Antaŭe troviĝis neniu vojo en ĝi. Ĉie en la loko prosperis piceoj, betuloj, sovaĝaj fruktarboj, kaj vivis aproj ursoj kaj leopardoj. Laŭdire, en la 12-a jarcento, oni konstruis tie sufiĉe larĝan vojon por transporti armean provianton. Kaj poste ĝi fariĝis la plej mallonga vojo de la montaro Tianshan okcidenten.
Ĉie en la valo Guozigou prosperas piceoj, unu el la plej valoraj arbospecoj en la montaro Tianshan. En la arbaroj kaj ĉe la riveretoj sporade kuŝas paŝtistaj tendoj. Legendo diras, ke en la antaŭa parto, la montaro prezentas pejzaĝojn de 4 sezonoj. Sur la montpinto kovrata de neĝo regas frosta vintro; sur la mont-talio prosperas arbaroj; sur la malsupra montdeklivo pompas floroj kiel en somero; kaj sur la fundo de la valo pulsas printempo.
|
|
|
