|
|
 |
| (GMT+08:00)
2004-06-01 08:51:26
|
 |
|
Gazetaraj Komunikoj
N-ro 178 (2004-05-16)
cri
BALOTADO PRI KOMITATANOJ B KOMENCITA
La 14-an de majo, la Centra Oficejo dissendis al la individuaj membroj de UEA voĉdonilon por elekti la komitatanojn B de UEA por la periodo 2004-2007. Ĉiu membro rajtas voĉdoni por 6 el inter 16 kandidatoj. La sinprezentoj de la kandidatoj akompanas la balotilon. Por partopreni en la elektado, necesos resendi la balotilon tiel, kd ĝi atingu la CO plej laste la 30-an de junio. La voĉoj estos nombritaj la 1-an de julio en la CO.
La voĉdonilo estis sendita al 4883 individuaj membroj, kiuj jam kotizis por la nuna jaro. La CO daŭrigos sendi ĝin ankaŭ al la malfruaj kotizontoj ĝis iom antaŭ la fino de junio. En la daŭro de la balotado la CO regule informos pri la nombro de revenintaj voĉdoniloj, por ke interesitoj povu sekvi la evoluon de la balot-aktiveco. La ĉefa informkanalo estos la Gazetaraj Komunikoj de UEA. Pri la evoluo de voĉnombroj por unuopaj kandidatoj oni evidente ne informos, ĉar la kovertoj kun balotiloj estos malfermitaj nur la 1-an de julio.
En la antaŭa balotado pri komitatanoj B, en 2001, voĉdonis 1887 membroj, t.e. 31,4% el la individuaj membroj, kiuj fine de la tiama balotperiodo nombris 6010. Rekorda aktiveco, absolute kaj proporcie, estis atingita en 1998, kiam voĉdonis 2328 membroj, t.e. revenis 33,6% el 6920 dissenditaj balotiloj.
MALFERMA TAGO POR LA 20-A FOJO
Sabaton, la 24-an de aprilo la Centra Oficejo en Roterdamo plenis ne nur pro gastoj de la Malferma Tago. La estraranoj de UEA komencis en dimanĉo 3-tagan kunsidon sed venis jam pli frue por havi okazon renkontiĝi kun vizitantoj de la 20-a Malferma Tago.
Eksredaktoro de la revuo "Esperanto" Istvan Ertl kaj movad-historiistino Zofia Banet-Fornalowa estis la ĉefgastoj. Ertl prezentis la libron "Ĉu nur-angla Eŭropo?" de la renoma socilingvisto Robert Phillipson. Ĝia Esperanta eldono, en traduko de Ertl, estis lanĉita en la Malferma Tago. Ĝi ankaŭ estis elirpunkto por du podiaj diskutoj, en kiuj la tradukinton apudis prezidanto Renato Corsetti, vicprezidanto Humphrey Tonkin kaj universitata lekciisto Wim Jansen. S-ino Banet-Fornalowa prelgis dufoje: pri la vivo de Lidja Zamenhof, kies 100-an naskiĝdatrevenon oni omaĝas ĉi-jare, kaj pri la aktuala stato de la Esperanta historiografio.
Kun 75-kapa ĉeesta merkato la libroservo de UEA vendis dum la tago varojn por 2739,21 eŭroj. La plej furora libro estis la novaĵo de Phillipson, kun 9 ekzempleroj. Du propraj verkoj de Istvan Ertl okupis la sekvajn lokojn: poemaro "Provizore", ankaŭ lanĉita samtage, kaj la satira romaneto "La postdomo", kun resp. 7 kaj 6 vendoj. La nova PIV trovis 5 novajn posedantojn. Inter la diskoj plej popularis "Esperanto-literaturo" (10 ekz.) kaj la novaĵo "Prezidantoj de UEA" (6 ekz.) el la serio "Tiel sonis..." de historiaj sondokumentoj.
TIEL SONIS... PREZIDANTOJ DE UEA
68 jaroj sur unu kompaktdisko
En la serio "Tiel sonis..." UEA prezentis ĝis nun la inaŭguron de la UK 1977 en Rejkjaviko kaj kompiladon el la Esperanta literaturo. La tria, plej nova kompaktdisko enhavas la voĉojn de iamaj prezidantoj: Privat, Malmgren, Canuto, Yagi, Lapenna, Tonkin, Maertens, Wells.
De Edmond Privat (1927) ĝis John Wells (1995) ŝanĝiĝis la movado, la mondo, kaj ankaŭ la tekniko. Por la UK en Danzig Privat enigis fajroplenan deklamon en la maŝinojn de la Berlin-a firmao Tri Ergon, kiu eldonis reklamcele sondiskon kun Esperanto-paroladoj. Du generaciojn poste Wells parolis mikrofone al la kongreso eĉ ne sciante ke la kongresejaj kunlaborantoj registras ĉion.
Malmultaj rememoras la voĉon de Giorgio Canuto, kies nomon havas la UEA-fondaĵo kiu membrigas homojn en malriĉaj landoj. La sondokumento aŭdigas lin ĉe la UK 1958. Multe pli konata certe estas Ivo Lapenna. Paroladon de li UEA registris en 1964, por sondisko. Dek jarojn poste la Magnetofona Servo de Rudiger Eichholz kaptis la Fermon de la Hamburg-a kongreso, kiam Humphrey Tonkin prezentis la nove elektitan Estraron.
La festparolado de John Wells en Tampere 1995 ricevis specialan atenton, ĉar Wells superrigardis ne nur siajn kvardek jarojn de esperantisteco, sed rememorigis ankaŭ pri du "pioniroj": Privat kaj Lapenna. Ĝuste la lastan, laŭ Wells, la movado ne ĉiam traktis konvene.
"Tiel sonis..." estas serio de kompaktdiskoj, kiujn Ziko M. Sikosek kompilis el materialoj konservataj en Biblioteko Hector Hodler de UEA. Kvara kaj lasta ero verŝajne temos pri la Universalaj Kongresoj. La prezo de unu disko estas 9,90 eŭroj (plus imposto de 19% por klientoj en EU kaj la sendokostoj).
|
|
|
