|
|
 |
| (GMT+08:00)
2004-07-28 15:27:59
|
 |
|
La templo Biyunsi
cri
La templo Biyunsi situas apud la parko Xiangshan, ĉ. 20 kilometrojn nordokcidente de Pekino. Ĝi estas la plej granda el la antikvaj temploj en la Okcidenta Montaro de Pekino.
Tiu templo sur iom post iom leviĝanta montdeklivo havas ses altecojn. La okcidenta Vajra Pagodo estas pli alta ol la orienta templa pordo je pli ol cent metroj. La templo konstruiĝis en la 14-a jarcento kaj portis la nomon Biyun'an. En la 16-a jarcento Yu Jing, eŭnuko prizorganta la imperiestrajn ĉevalojn, konstruis lokon por sia estonta tombo malantaŭ la templo. Tiam la templo estis plivastigata. Kaj oni nomis ĝin publika templo. Poste en la komencaj jaroj de la erao Jiajing, Yu Jing estis malliberigita kaj mortis en karcero. En 1623, eŭnuko Wei Zhongxian plivastigis tiun lokon por sia eterna ripozo. Poste en 1628 ankaŭ Wei Zhongxian estis kondamnita kaj sin mortigis. En la dinastio Qing, imperiestroj kaj iliaj edzinoj ŝatis la pejzaĝojn de la templo kaj frekventis tien. En 1748, la imperiestro Qianlong ordonis pligrandigi la templon, tiel ke oni konstruis la sudan korton kun halo de 508 skulptitaj arhatoj imite al al Jingci-templo ĉe la Okcidenta Lago en la urbo Hangzhou, suda Ĉinio kaj la Vajran Pagodon en la plej okcidenta parto de la templo.
Post la fondiĝo de la nova Ĉinio en la jaro 1949, la popola registaro riparis la templon kaj rekonstruis la Memoran Halon de Sun Jatsen, la granda pioniro de la ĉina demokratia revolucio. En la halo estas kristala ĉerko donacita de Sovetunio, busto de Sun Jatsen kaj liaj aŭtografoj kaj verkoj. En la du flankaj ĉambroj eksponiĝas fotoj pri lia revolucia aktivado.
La templo Biyunsi rigardas orienten kaj ĝiaj ĉefaj konstruaĵoj estas la Ĉielreĝa Halo, la Bodisatva Halo, la Arhata Halo, la Memora Halo de Sun Jatsen kaj la Vajra Pagodo. Ili sidas unu super alia laŭ montdeklivo. Proksime al la orienta templa pordo troviĝas blanka ŝtona ponto, sub kiu estas profundaĵo, kie lirlas fontakvo. Ĉirkaŭe staras altaj soforoj kaj salikoj, antikvaj pinoj kaj cipresoj. Se vi venas tien en varmega somero, vi tuj sentas agrablan malvarmeton. Antaŭ la ponto sin trovas paro da kaŭrantaj ŝtonaj leonoj, kiuj estas delikate skulptitaj kaj aspektas furioze.
Enirinte la orientan templan pordon, vi venos al la unua korto, kie esas la Ĉielreĝa Halo. Post tiu halo troviĝas la dua korto, kiu sidas en la mezo de la templo, kun ŝtona ponto, orfiŝa lageto ĉirkaŭata de blanka ŝtona balustrado, blankŝelaj pinoj, ginkoj kaj ŝtonaj kolonoj kun sutro. En la korto staras la Bodisatva Halo, kiu konstruiĝis en la dinastio Ming. Sude de ĝi sin trovas la Arhata Halo, originala budhisma konstruaĵo, en kiu estas 508 skulptitaj arhatoj en malsamaj pozoj. Estas tre interese, ke sur trabo sidas statueto de bonzo Jigong. Oni diras, ke ankaŭ li origine estis arhato, ĉar li alvenis malfrue kaj la sidlokoj estis okupataj de la aliaj, tial li devis resti sur la trabo. En la halo la arhatoj estas metiaj en kelkaj cirkloj. Ĉiu statuo el ligno altas ĉ. 1,5 metron. La plejparto de la statuoj sidas kun diversaj mienoj rideta, medita, ridega, dolora kaj kolera. La tuta konstruaĵo kaj la skulptitaj statuoj estas valora religia artaĵo. Norde de tiu halo troviĝas kelkaj domoj destinitaj por ripozejo de la vizitantaj imperiestroj.
Trapasinte la Bodisatvan Halon, vi povas atingi la trian korton, kie staras la Memora Halo de Sun Jatsen. Malantaŭe sin trovas kvieta ĝardeneto kun fontakvo lirlanta el ŝtonaj fendoj, tiel ĝi portas la nomon Fonta Korto. Tie troviĝas ankaŭ la Tri-fea Kaverno kaj kurioza arbo.
La lasta konstruaĵo estas la Vajra Pagodo, kiu situas okcidente de la Memora Halo de Sun Jatsen. Ĝi estas la plej malantaŭa kaj plej alta parto de la templo Biyunsi. Ĝi konstruiĝis en 1748 imite al la templo Wutasi en la nordokcidenta parto de Pekino. Ĝi sidas vizaĝe al oriento, sur 34,7 metrojn alta montdeklivo. Sur la 2-etaĝa bazamento staras kvin 13-etaĝaj kvadrataj pagodoj, du rondaj lamaismaj pagodoj kaj unu eta vajra pagodo. Post la forpaso de d-ro Sun Jatsen en la 12-a de marto, 1925, lia ĉerko sidis en la Vajra Pagodo kaj en majo de 1929 translokiĝis al la monto Zijinshan en la urbo Nankino, suda Ĉinio. Liaj ĉapelo kaj vestoj estas konservataj ankoraŭ en la pagodo kiel memoraĵo. De tiam la pagodo portas alian nomon "Tombo de Ĉapelo kaj Vestoj de D-ro Sun Jatsen". La ok pagodpintoj formis variajn konturojn. Ili ĉiuj konstruiĝis el ŝtono kaj surhavas multajn reliefojn, ekzemple figuroj de grandaj kaj malgrandaj budhoj, ĉielaj reĝoj, forteguloj, drakoj, feniksoj, leonoj kaj nuboj. Tiu konstruaĵaro vere estas artaĵo kombinanta ĉinajn gravuran kaj arkitekturan artojn, kvankam ĝi estas de tipa hinda stilo. Ĉiu, kiu vizitas la parkon Xiangshan, certe ne forgesas pririgardi la faman templon Biyunsi.
|
|
|
