Ji'an situas en la montaro Changbai de la nordorienta landparto de Ĉinio, kie abundas je ginsengo. Laŭdire jam antaŭ 4000 jaroj, oni sciis la kuracan valoron de ginsengo, kaj ankaŭ la moderna scienco montras, ke ginsengo utilas al la homa sano kaj povas longigi la homan vivon.

Oni nomas Ji'an "hejmo de ginsengo". Ĝi troviĝas en la baseno de Xinkai-rivero kaj estas ĉirkaŭita de primitiva arbaro, kie la organikaj elementoj de la tero, senpolucia aero, duonoceana klimato kaj sufiĉa sunlumo helpas kreskadon de ginsengo. La tiea ginsengo havas ne nur grandan produktokvanton, sed ankaŭ bonan kvaliton, precipe "Xinkaihe"-panako, fama vario de Ji'an-ginsengo, kiun oni prilaboras en ruĝan ginsengon kun kristala kerno.

Ji'an havas longan historion kaj riĉan kulturon. La antikva tombejo de la regno Gaogouli estas difinita de la ĉina Ŝtata Konsilantaro kiel protektata restaĵo.

En la 3-a jaro p.K. la regno Gaogouli translokis sian ĉefurbon al Ji'an ĉe Yalu-rivero, kaj en la 427-a jaro al Pjongjango de Koreio. Dum 425 jaroj, Ji'an estis centro de politiko, ekonomio, kulturo kaj milita afero de la regno Gaogouli. Subtere kaj surtere de Ji'an troviĝas multaj kulturaj restaĵoj kaj sennombraj antikvaj tomboj en la ĉirkaŭurbo de Ji'an.

El la tomboj la plej atentokaptaj estas la reĝa tombo kaj generala tombo, kiuj aspektas kiel piramidoj de Egiptio. La bone konservita generala tombo, kiu apartenas al la Longviva Reĝo la 20-a de la regno Gaogouli, situas je 4.5 kilometroj nordoriente de la urbo Ji'an. Ĝi aspektas kiel prismo kun alteco de 12.4 metroj kaj havas 7 ŝtupojn. La areoj de la bazo kaj supro estas 960 kaj 270 kvadrataj metroj respektive. La tombo estis masonita el granito kaj rulŝtonoj. Por preventi aliformiĝon pro peza premo de la granito, ĉe la 4 flankoj de la tombo oni metis po 3 grandajn ŝtonojn, el kiuj la plej malpeza havas pezon de pli ol 15 tunoj. Inter la 3-a kaj la 5-a ŝtupoj estas tomba ĉambro en kvadrata formo, longa je 20 metroj kaj alta je 5.5 metroj, kun pasejo en la mezo de la 5-a. La du ĉerkoj estis riparitaj post priŝtelo. Estas mirinde, ke la tegmento de la tombo estas kovrita de granda ŝtono de pli ol 60 kvadrataj metroj, kiu pezas pli ol 50 tunojn. Laŭ la fera ŝtuparo en la sudorienta flanko de la tombo oni povas supreniri la ĉambron aŭ tegmenton. En la tombejo troviĝas 1 akompana tombo, sed antaŭe 5.

Haotai-tombo apartenas al la Reĝo Pionira la 19-a de la regno Gaogouli. Pli granda ol la generala tombo, nun ĝi jam disfalis kaj restis monteto el senordaj ŝtonoj. La meza kaj supra partoj de la tomba ĉambro estis priŝtelitaj, nun nenio ene. Ĉe la tombo troviĝas steleo de Reĝo Pionira la 19-a, alta je 6.4 metroj. Sur la steleo estas gravuritaj vortoj pri la historio de la regno Gaogouli kaj milita merito de la reĝo.

Nun Ji'an ankoraŭ malproksimas de moderna industrio. Blua ĉielo, verdaj montoj kaj klara akvo formas belan naturan medion. En la montaro Changbai, 108-2000 metrojn super la marnivelo, estas vertikala flaŭra zono kun multe da raraj vegetaloj. En la profunda montaro vivas nigra urso, sovaĝa porko, makulhara cervo, vulpo, fazano kaj aliaj animaloj.

La monto Laoling en norda Ji'an estas sudokcidenta branĉo de la montaro Changbai. Ĝi estas bela kaj grandioza. Sur ĝi troviĝas apikaj rokoj kiel kolonoj, groteskaj ŝtonoj, maljunaj arboj ĉirkaŭitaj de liano, sovaĝaj herboj, kiuj altiras papiliojn kaj birdojn. En malfrua aŭtuno la montaro estas kovrita de arbofolioj el diversaj koloroj: roza, skarlata, amaranta, orflava, palflava, smeralda, palverda...

La arbara parko Kvin-knabina Montpinto estas la plej bela loko en la urbo Ji'an. Tie 5 montoj paralele staras kiel 5 belaj knabinoj en buntkoloraj vestoj. Laŭ legendo, sur la ĉielo estis 5 feinoj, kiuj rigardis Ji'an bela loko. Ili ŝtele venis en la homan mondon, ĝoje ludis en la montaro kaj rivereto kaj forgesis reveni al la ĉielo. Rimarkinte tion, la ĉiela reĝo punis ilin, transformante ilin en 5 montpintojn.