Laŭ konigo fare de s-ro Ni Bin, el ĉiuspecaj fiŝoj kreskantaj en la rivero Yangzi, tri specoj estas la plej famaj, t.e. spadfiŝo, makruro (Macrura Reevesii) kaj blenio, kiuj estas nomataj "tri frandaĵoj el Yangzi", kaj Zhenjiang ja estas la ĉefa produktejo de tiuj tri-specaj fiŝoj. Inter la menciitaj trispecaj fiŝoj, la plej renoma estas makruro. Oni nomas ĝin "reĝo de fiŝoj". Tiel frue kiel antaŭ pli ol mil jaroj, tia fiŝo jam estis rigardata kiel kurioza frandaĵo. Laŭdire, makruro ege zorgas pri siaj skvamoj, kaj je ektuŝo de reto, ĝi ne moviĝas plu por eviti difektiĝon de siaj skvamoj. La fama antikva poeto de Ĉinio Su Dongpo donis al ĝi alinomon "Skvamo-ama Fiŝo". S-ro Ni Bin diris, ke tre malmultas la kvanto de la makruro, eĉ en Zhengjiang ne estas facile trovi ĝin. Se bonŝance vi vizitos tian restoracion, kiu vendas pladon el tia fiŝo, do nepre ne preterlasu tian ne ofte troveblan ŝancon.

La ĉefa kuira maniero de la makrura plado estas vaporumado. Kvankam vaporumita fiŝo estas unu el la ofte videblaj ĉinaj pladoj, tamen la vaporumita makruro estas eksterordinara plado, ĉar oni vaporumas makruron sen skvamigi ĝin kaj lasas, ke manĝanto mem forigu la skvamojn de la vaporumita fiŝo. La arĝente blankaj skvamoj de makruro posedas multe da graso, kaj kiam makruro kun skvamoj estas vaporumita, la fiŝaĵo fariĝas ankoraŭ pli bongusta. Dum la manĝado oni spicas la fiŝaĵon per zingibro kaj vinagro produktitaj en Zhenjiang, tiamaniere la plado ankoraŭ pli frandiĝas.

En restoracioj ĉe la strato Jiangxian, gastoj povas gustumi multe da tradiciaj famaj pladoj, kia la vaporumita alozo, kaj ankaŭ la preparaj metodoj de tiuj tradiciaj pladoj estas indiĝenecaj. Ekzemple, ĉinoj kutimas kuiri la freŝan fiŝon per akvo de la rivero, kie ĝi kreskis, kaj opinias, ke nur tiamaniere la preparita fiŝaĵo povas gusti originale. Ĉiuj restoracioj ĉe la strato Jiangxian aplikas tian metodon dum la kuirado de la freŝaj fiŝoj kaptitaj el la rivero Yangzi.

Sur la strato Jiangxian, oni povas ne nur kontentigi sian apetiton, sed ankaŭ sperti la popolan moron de la fiŝistaj vilaĝoj de la urbo Zhenjiang. Preskaŭ ĉiu restoracio sur tiu strato estas familia, tio signifas, ke de kuiristoj ĝis kelneroj ĉiuj apartenas al unu familio: la edzino purigas la fiŝon, la edzo kuiras, gefiloj servas kiel kelneroj. Tia sceno videblas ĉie. Prenante la manĝon en tia restoracio, vi povas vidi, ke la tuta familio klopodas por regali vin per bongustaj pladoj, kaj senti vin gastiĝi en fiŝista familio.

Diversaj restoracioj kun la relative granda skalo posedas la propran trajton kaj estas tre vizitindaj. Ni prenu kiel ekzemplon la restoracion "Ora Ŝipo", konstruitan sur plezurboato. La plezurboato kun du etaĝoj ankriĝas ĉe bordo de la rivero Yangzi. Estas tre agrable por manĝanto ĝui frandajn pladojn preparitajn el riveraj kreskaĵoj, kaj samtempe apreci belajn pejzaĝojn de la rivero Yangzi. Laŭ konigo fare de la mastro de tiu ŝipo s-ro Qian Shuangxi, ke lia restoracio estas la unika sur-rivera restoracio, kiun li fondis dum unu tuta jaro, helpate de siaj 8 gefratoj.

Karaj amikoj, ĉu tiu strato plaĉas al vi? Se vi eventuale vojaĝos al Zhenjiang, eble vi trovos, ke pladoj de la restoracioj de riveraj kreskaĵoj estas gustumindaj. S-ro Douglas J. Pensak el Usono esprimis, ke li jam ekŝatis la straton Jiangxian. Li diris:

"Neniam antaŭe mi manĝis tiajn fiŝ-pladojn, kiujn mi prenis ĉi tie. Eble en Usono ne ekzistas similaj fiŝoj. Ĉitie-aj fiŝoj estas tre bongustaj kaj tre plaĉas al mi."

Antaŭ du jaroj, s-ro Douglas J. Pensak venis al Zhenjiang kaj nun laboras tie. Se tempo permesas, li ĉiam venas al la strato Jiangxian kune kun siaj amikoj, por apreci la riverajn pejzaĝojn kaj manĝi la frandaĵojn en tiuj restoracioj sur la strato Jiangxian.