Johann Pachter, la posedanto de la domo, komisiis inĝenieran oficejon pri la teknikaj planistaj laboroj. Krome Peter Kühnel, esperantisto kaj konstru-inĝeniero, transprenis la taskon de konsilanto kaj kunordiganto de la laboroj. Ili planas, ke la Berlina Oficejo de Germana Esperanto-Junularo kaj la kvin loĝejoj estos denove uzeblaj fine de decembro 2005. Necesas prokrasti la renovigon de la korta domo.

Ĉar la ĉefdomo bezonas tute novan tegmenton, oni pripensas pligrandigi la uzeblan spacon en la tegmenta etaĝo per pli alta kaj malpli klinita tegmento kaj grandaj tegmento-fenestroj, se tion permesas la urbaj aŭtoritatoj. Tiel oni gajnus multe da spaco: por la Germana Esperanto-Arkivo, por la Espoteko, por kunvenejo kaj por pasportserva ĉambro. La domo havus kvar plenajn etaĝojn: teretaĝon, du pliajn etaĝojn kaj tegmento-etaĝon. La tegmentoetaĝo estu preta meze de 2006.

La 7-an de novembro je 19:30 okazos en Kafejo Multi-Kulti (Schönfliesser Strasse 7) prelego de Johann Pachter kaj Peter Kühnel pri la nuna stato kaj perspektivoj de la Esperanto-domo en Lichtenberg. Sekvos - certe vigla - diskuto.