 Menciante la provincon Sichuan en la sud-okcidenta landparto de Ĉinio, oni ofte ekpensas pri tieaj konataj pladoj karakterizataj je tikleco, pikeco kaj bongusteco. En la hodiaŭa programero ni konduku vin al Chengdu, ĉefurbo de la provinco Sichuan, por gustumi tiean faman pladon nomatan Huoguo.
En la urbo Chengdu tre popularas la plado Huoguo, kaj la nombro de huoguo-aj restoracioj superas dekmilon. Preparado de Huoguo ĝenerale estas kiel jene: unue oni metu en poton la spicitan supon, kaj metu la poton sur fajron por boligi la  supon. En la boligitan supon oni aldonu diversajn manĝaĵojn por kuiri ilin, kaj manĝu la preparitajn manĝaĵojn. Dum preparado de la plado Huoguo, plej grave estas bone kuiri la supon, kaj ĉiu fama huoguo-a restoracio de Chengdu havas sian propran sekretan recepton.
Chengdu-anoj ŝatas pikajn manĝaĵojn, kaj la plej plaĉa speco de la plado Huoguo estas pike gusta pro enmeto de la granda kvanto da kajena pipro kaj kapsiko. Ĉar la supo ene de la poto estas ruĝ-kolora, tial la plado estas nomata "Huoguo de ruĝa supo". S-ro Feng Dequan, kiu entreprenas huoguo-an restoracion jam multajn jarojn, opinias, ke kaŭze de la  loka klimato, Chengdu-anoj ekŝatis tiun pladon. Li diris:
"Oni opinias, ke en la urbo Chengdu malofte videblas la suno la tutan jaron. La Chengdu-ebenaĵo estas tre humida, pro tio oni sentas sin pli komforte, preninte pikajn manĝaĵojn."
Se vi ne kutimas preni tiel pikan specon de la plado Huoguo, vi povas elekti la specon "Huoguo de blanka supo". La supo de tia speco de la plado Huoguo estas preparita el kokosto aŭ porkosto kun sanigaj ĉin-medicinaj drogoj, kaj la  koloro de la supo estas blanka.
Se vi volas provi ambaŭ specojn de la plado Huoguo, vi povas elekti tian specon nomatan "Yuanyang Huoguo". En la ĉina lingvo, la vorto Yuanyang signifas "ambirdojn". Dum preparado de tia speco de Huoguo, kuiristo uzas specialan poton, kiu dividiĝas en du partojn ene por enteni respektive ruĝan supon kaj ankaŭ blankan supon, sekve manĝantoj povas elekti la supon pikan aŭ nepikan laŭ sia plaĉo.
 S-ino Du Juan loĝas en la urbo Chengdu de multaj jaroj, kaj jam estas erudiciulo pri la urbo Chengdu. Ŝi diris, ke Chengdu-anoj ĝenerale elektas malsamajn specojn de la plado Huoguo laŭ malsamaj sezonoj. Ŝi diris:
"En nia urbo Chengdu estas tre multaj specoj de la plado Huoguo, ĉiuj estas tre bongustaj. Ni prenas malsamajn specojn de Huoguo laŭ kvar sezonoj. Ekzemple, en somero ni emas preni pikan specon de Huoguo, por nin ŝvitigi, tio efikas por malgrasigi kaj ankaŭ komfortigi la korpon; vintre ni prenas la specon de Huoguo el blanka supo, ĝi estas kaj varmiga kaj juniga."
|
