 En nia lando la urbanoj de Chengdu estas konataj pro senzorgemo kaj senĝeneco. En postlaboraj horoj ili emas sin amuzi per ludo Maĝango kaj vizito al te-trinkejoj. Ni konduku vin al Chengdu por gastiĝi tie kiel te-trinkantoj.
Ĉar Chengdu-anoj ŝatas viziti te-trinkejojn, tial en tiu urbo troviĝas multe da te-trinkejoj, kiuj varias laŭ skalo kaj lukseco. Precipe ĉe malnovaj stratoj kaj stratetoj ofte videblas te-trinkejoj, kiuj ĉiam estas homplenaj. 
La te-trinkejo aparte plaĉas al Chengdu-anoj, ĉar tie ili povas libere babiladi pri diversaj problemoj kaj aŭdi interesajn rakontojn el diversaj tempoj. Fakte la malgranda te-trinkejo similas al la granda socio. Ĉi tie komercistoj diskutas pri negocoj, emeritoj ĝuas sen-okupan tempon, amikoj rememoras belajn tagojn kune pasigitajn, geamantoj kolombumas ktp. Juna sinjoro Zhao Shengsheng, kiu ofte vizitas te-trinkejon, diris, ke teo povas kaj sensoifigi kaj refreŝigi. Kiam taso da teo estas englutita, la cerbo fariĝas sobra, kaj ankaŭ la longa babilado daŭras senfine. Li diris: 
"Kiam mi estas libera, mi kutimas veni al te-trinkejo, kie mi povas apreci pejzaĝojn aŭ spekti prezentadon de te-ceremonio. Ĉi tie mi interparolas pri komercado kun kolegoj, kaj iam mi babilas kun amikoj pri privataj aferoj."
Laŭ strukturo kaj etoso, la te-trinkejoj de la urbo Chengdu estas multe diferencaj disde tiuj en aliaj lokoj de Ĉinio. En te-trinkejoj de norda Ĉinio popularas la alta tablo, longa benko kaj serioza etoso iom enuiga; sed en la urbo Chengdu, la te-trinkejoj estas karakterizataj je komforta sidejo, gustoplena teo kaj humura etoso. La te-trinkejaj tabloj briletas pro longa uzado, bambuaj apogseĝoj tute taŭgas al la movo de homaj membroj, evitigas al sidantoj dormemon malsame ol sofo kaj ferdek-seĝo, kaj faras te-trinkantojn senlacaj eĉ post la tuttaga restado tie. Chengdu-anoj kutimas viziti jam la de si konatan te-trinkejon. Por alilokaj turistoj, kiuj volas sperti la guston de malnovaj te-trinkejoj, la plej bona  loko eble estas tiu ĉe la ponto Nanqiao de la akvoutiliga konstruaĵo Dujiangyan. Tie multas homoj kaj belas la vidindaĵoj el riveraj fluoj, grandaj arboj, te-trinkejoj kaj lokaj manĝetoj, kaj regas la granda vigleco. S-ro Wu Qing, posedanto de iu malgranda te-trinkejo, diris, ke la trajto de malgrandaj te-trinkejoj estas, ke ĉi tie te-trinkantoj sentas sin kiel hejme, sen ajna sinĝeneco. Li diris:
"Mia te-trinkejo posedas la teon el diversaj famaj specoj, liveras la vastan spacon al te-trinkantoj kaj ankaŭ sufiĉan komfortecon al ili."
|
