"Fakte mi sentas min tre agrable hodiaŭ, kiam mi vizitas la straton Jinli. Estas tiel multe da brikabrakoj kaj frandaĵoj, kaj Chengdu vere riĉas je bongustaj manĝaĵoj."

La strato impresas turistojn per la densa etoso de indiĝena kulturo. Sur la strato ĉie videblas lokaj metiartaĵoj tre plaĉaj al turistoj. Argilaj figuroj kaj paper-tondaĵoj vekas ilian interesiĝon, rememorigante al ili la gajan infanecon.

Brodaĵo de la provinco Sichuan nomata Shujin estas fame konata tra la lando, kaj sur la strato Jinli aĉeteblas tia brodaĵo.

En la meza sektoro de la strato Jinli troviĝas vasta spaco, kie ekzistas antikve stila teatro, kaj oni regule faras prezentadon de klasikaj programeroj de la loka opero Chuanju. Sed aparte plaĉa al turistoj estas ombroteatraĵo, kiu estas unu el la tradiciaj artaĵoj de Ĉinio, kaj havas historion de pli ol mil jaroj. Zorgeme tranĉite kaj ornamite de metiartistoj, malgrandaj ombro-figuroj povas vivece prezenti historiajn metamorfozojn. Al la ombroteatraĵa scenejo de la strato Jinli ĉiutage svarmas turistoj, inkluzive de multaj alilandaj turistoj, kiuj aparte interesiĝas pri ombroteatraĵo. Aŭstraliaj turistoj s-inoj Catherine Jones kaj Roy Jackson diris:

"Ni estas Catherine kaj Roy. Ni ambaŭ estas aŭstralianoj. Nur antaŭ dek minutoj ni alvenis ĉi tien, tamen ni vere ŝatas la etoson de tiu strato. La ruĝaj lanternoj ĉie pendantaj estas tre plaĉaj al ni, impresante nin per intimeco, kaj la ombroteatraĵo ege interesas nin."

S-ro Zhou Yinong sin okupas pri prezentado de ombroteatraĵoj, kaj sentas fierecon pro tio, ke la ombroteatraĵo estas bonvenigata de turistoj. Li diris:

"Mi amikiĝis kun multaj turistoj en- kaj ekster-landaj. En la pasinta monato, kiam reporteroj de itala televidstacio venis ĉi tien por fari specialan programeron, mi instruis al ili fari ombrofigurojn kaj ankaŭ prezentadon de ombroteatraĵoj. Reveninte al sia lando, ili konigos tion al siaj popolanoj, por ke italoj konu la ĉinan kulturon."