Menciante industriajn entreprenojn de Guangxi, ni devas unue paroli pri la Inĝenier-mekanika Limigita Kompanio de la urbo Liuzhou. Ĝi kroniĝas super la sam-fakaj entreprenoj de Ĉinio, kaj kreis multajn rekordojn, ekzemple kreado de la unua rada ŝarĝilo, la unua artikita ŝarĝilo, la unua subŝakta ŝarĝilo kaj la unua plej grand-tonelara ŝarĝilo. Nuntempe la kompanio jam fariĝis grandtipa trunka entrepreno pri esplorado, ekspluatado, produktado kaj vendado de inĝenieraj maŝinoj, ankaŭ estas la ĉina unua inĝenier-mekanika kompanio en-borsiĝinta. La kaŭzo, kial la kompanio povas teni la kontinuan altrapidan kreskadon, kuŝas en tio, ke ĝi ĉiam metas la renovigan kreadon sur la gravan lokon.

Kiam ni faris intervjuon en la kompanio, tie estis okazanta la teknika konkurso pri la manipulado de grandtipaj maŝinoj. En la konkursejo, la pezegaj maŝinoj ege surprizis nin, ĉar la kolosa fosmaŝino kapablas ne nur elfosi monton da tero, sed ankaŭ penike skribi ideogramojn, nombri monbiletojn kaj uzi poŝtelefonon. S-ro Zhang Erping, respondeculo pri teknika esplorado de la kompanio, fiere diris al ni, ke la lerta manipulado de la kolosaj fosmaŝinoj atribuiĝas al la perfekta unueco de iliaj elektronika reg-sistemo, hidraŭlik-prema sistemo kaj struktura sistemo, kiuj ĉiuj estis sendepende esploritaj kaj faritaj de la kompanio mem. S-ro Zhang diris:

"Niaj fosmaŝinoj lertas kaj precizas en la laborado, simile al robotoj."

Ĝuste pro senĉesaj sendependaj esplorado kaj kreado, la kompanio ne nur sukcese okupas la unuan lokon inter la enlandaj ŝarĝilaj entreprenoj, sed ankaŭ disvastigis sian merkaton al pli ol 60 landoj kaj regionoj sur la tuta terglobo. S-ro Huang Zhaohua, vic-ĝenerala direktoro de internacia departemento de la kompanio, konigis:

"Laŭ la merkata kontingento, ni jam fariĝis grava konkurencanto en la internacia merkato. Ekzemple, en la hinda merkato nun ni jam okupas pli ol 60%, pli multe ol tiu de Caterpillar; en iuj evoluintaj landoj, kiaj la nord-amerikaj, ni ankoraŭ nin trovas en la primara stadio, tamen ni havas memfidon por bone ekspluati nian merkaton tie; kaj Mezoriento kaj Afriko ambaŭ estas niaj tradiciaj merkatoj."

La Kompanio Caterpillar menciita de s-ro Huang estas unu el 500 plej potencaj entreprenoj de la mondo kaj antaŭiras en la kampo de produktado de inĝenieraj maŝinoj. Laŭ opinio de s-ro Huang Zhaohua, fariĝi forta konkurenca rivalo de la Kompanio Caterpillar estis tute neimageble en la komenca periodo de lia kompanio. Fakte, en la komenco la Kompanio Caterpillar servis kiel instruisto de lia kompanio.

Tamen por rivali kun la iama instruisto, de multaj jaroj, la Inĝenier-mekanika Limigita Kompanio de la urbo Liuzhou senĉese pliigas investon al la scienca esplorado kaj fortigas kreadon, kaj konsumas 4% de ĉiujara enspezo por la scienca esplorado. La antaŭa scienc-esplora teamo el malpli ol 20 membroj nun vastiĝis ĝis 18 institutoj kun pli ol 500 membroj. Samtempe kun tio, ankaŭ la vend-sumo kaj eksport-sumo de la kompanio senĉese altiĝas. Laŭ donitaĵoj, en la antaŭaj 9 monatoj de 2008, la kompanio realigis la enspezon je 8 miliardoj da juanoj; en la pasintaj tri jaroj, la jara kreska proporcio de eksportaj produktaĵoj de la kompanio superis 100%, kaj la kompanio venkis la ĉefajn internaciajn rivalojn en merkatoj de Hindio kaj Maroko en vendado de furoraj inĝenieraj maŝinoj. Pri la ĉijara vend-sumo s-ro Huang Zhaohua estas plena je memfido. Li diris:

"Ni konkurencas ne per prezo, sed per valoro, la ĉijaraj vend-kvanto pliiĝis je 70% ol tiu de 2007, kaj vend-sumo je pli ol 90%."