En la ĉina literatura historio estas kvar famaj klasikaj verkoj, tio estas, "Pri Tri Regnoj", "Ĉe Akvarando", "Pilgrimado al Okcidento" kaj "Sonĝo en Ruĝa Domo". Tiuj ĉi kvar klasikaj romanoj estas influaj ne nur en Ĉinio eĉ en la mondo. Interalie, la rakontoj de la mita romano "Pilgrimado al Okcidento" vaste popularas inter la popolanoj. Hodiaŭ ni do konigu al vi la aŭtoron de la romano "Pilgrimado al Okcidento", fama romanisto Wu Cheng'en.

Wu Cheng'en naskiĝis en etkomercista familio en Huaian de Jiangsu, en la dinastio Ming, en la 16-a jarcento. De sia infaneco li estis inteligenta, scivolema kun multflanka talento. Li lertis en pentrado, kaligrafado, poezio kaj goado kaj ankaŭ ŝatis kolekti famajn kaligrafaĵojn kaj pentraĵojn. Kaj pro tio li estis multe laŭdata. En la ĉina antikveco, intelektuloj intencis fariĝi ŝtata oficisto pere de ekzamenado; ankaŭ li ne estis escepto. Tamen pro la neracia feŭda ekzamena sistemo kaj oficistara korupteco, li ne sukcesis en pluraj ekzamenadoj. Li vivis malriĉan vivon. Ĉio ĉi donis al li profundan konon pri la feŭda oficistara korupteco kaj la rilatoj inter homoj. Enradikiĝis en lia koro la semo kontraŭ maljusteco en la socio. Li esprimis sian vidpunkton en sia verko: la kialo de la malbela realeco de la socio kuŝas en tio, ke la regantoj ne bone tenas promociadon kaj lasas malbonulojn en regadon. Li ege intencis ŝanĝi tiun nigran realecon, tamen al li ege talenta mankis ŝanco kaj li povis nur veadi antaŭ la realeco. Li do verŝis siajn koleron, indignon kaj idealon en verkadon de la romano "Pilgrimado al Okcidento".

"Pilgrimado al Okcidento" estas mitologia romano plej sukcesa en la ĉina historio. Prenante kiel originon la rakonton pri la pilgrimado al Hindio fare de la ĉina fama budaisma majstro Xuan Zang de la dinastio Tang en la 7-a jarcento la romano fikciis intrigon, ke Xuan Zang kaj liaj tri disĉiploj konkeris diversajn malfacilojn kaj obstaklojn sur la vojo de pilgrimado kaj en tio la romano modlis sukcese la simian figuron "Sun Wukong", kiu ne timas ian ajn aŭtoritatecon kaj toleras neniun fiforton kaj nebule esprimas la deziron de la aŭtoro pri reala vivo.

Kvankam la verkado estis plenumita en malfruaj jaroj de Wu Cheng'en, tamen li tion preparis dum sia tuta vivo. En sia infaneco, li sekvis sian patron ekskursi al antikvaj temploj kaj arbaroj apud Huaian. Dum la ekskurso la patro rakontis al li koncernajn mitojn belajn kaj groteskajn. Li estis scivolema de infaneco kaj jaron post jaro la scivolemo pliiĝis sed ne falis. Post sia 30-jara aĝo li kolektis multege da kuriozaj materialoj kaj kovis en si verkadon. Li, ĉirkaŭ 50-jar-aĝa, verkis la unuajn dekojn da ĉapitroj, sekvis plurjara paŭzo, kaj en siaj malfruaj jaroj li finis la verkadon de la romano "Pilgrimado al Okcidento".

La romano "Pilgrimado al Okcidento" konsistas el pli ol cent rakontoj, kiuj kaj estas sendependaj inter si kaj ligiĝas unuj kun aliaj. En la rakontoj estas feoj kaj demonoj, kiuj reprezentas respektive justecon kaj brutalecon. La aŭtoro konstruis en la tuta romano bizaran mitologian mondon, en kiu ĉie estas homaj figuroj: Suverena Ĉiela Imperietro – stulta imperiestro en la realeco ne distinganta moralon kaj malmoralon; la Hadeso – feŭda dinastio, kie la korteganoj fiprofitas kaj senkulpigas unu alian kaj distordas leĝon; demonoj, kiuj mortigas kaj manĝas homon, avidemas kaj estas lascivaj, senkulpuloj ne povas sin liberigi el persekutiteco – simboloj de tiranoj kaj burokratoj. Tamen aliflanke, la "ĉarma simio-reĝo" Sun Wukong, modlita de Wu Cheng'en, ege kompetentas en luktarto, malamegas malbonaĵon, eliminas demonon kaj malestimas nejustan aŭtoritaton, kaj sin titolas per "Granda Saĝulo Egala al la Ĉielo", eĉ antaŭ la Ĉiela Imperiestro. Ĉe la magia simio Wu Cheng'en metis sian fortan deziron forbalai la abomenindajn aferojn kaj fortojn en la socio. Sed dum protektado al la majstro en la pilgrimado la magia simio estas nefidata de diversaj flankoj, inkluzive de la majstro kaj plijunaj kunpilgrimantoj, estas jungata kaj nejuste traktata, tute similas al la talentulo en la reala socio.

Wu Cheng'en estas plurflanke talenta rilate al literaturo. Li verkis ankaŭ multe da poemoj kun malsamaj stiloj, kiuj estis kolektitaj en lian verkaron "Verkoj de sinjoro Sheyang". Komprenebe lia romano "Pilgrimado al Okcidento" estas plej influa al la posteuloj. En centoj da jaroj ĝi estis adaptita al porinfanaj literaturaĵoj, filmoj, televidaj teatraĵoj kaj teatraĵoj en aliaj formoj. La figuro de "ĉarma simio-reĝo" Sun Wukong estas renoma tra la tuta mondo.