Defenda ministerio okazigis akcepton por festi fondiĝan datrevenon de PLA

La Ministerio pri Nacia Defendo marde okazigis akcepton por festi la 92an datrevenon de la fondiĝo de la Popola Liberiga Armeo (PLA), kiu falas en la 1a de aŭgusto.

Nome de la Centra Komitato de la Komunista Partio de Ĉinio, la Ŝtata Konsilio kaj la Centra Milita Komisiono, ŝtata konsilanto kaj ministro pri nacia defendo Wei Fenghe esprimis salutojn de la Armea Tago al la membroj de la Popola Liberiga Armeo, la Armita Polico, la rezerva forto, la milico, civila personaro, veteranoj, armeaj herooj kaj modeloj.

Wei diris en la akcepto, ke la armitaj fortoj ĉiam subtenos la absolutan gvidadon de la partio. Li akcentis, ke Ĉinio firme laŭiros la vojon de paca disvolvado, sekvos defensivan nacidefendan politikon, kaj laboros kun aliaj landoj por fari pli grandajn kontribuojn al paco kaj stabileco de la mondo. Estas nur unu Ĉinio, kaj Tajvano estas integra parto de ĉina teritorio. Li promesis, ke la Popola Liberiga Armeo firme protektos nacian suverenecon, sekurecon kaj teritorian integrecon.